追蹤
黑長尾雉棲息地
關於部落格
看的.想的.想說的.都在這裡.
  • 17136

    累積人氣

  • 0

    今日人氣

    0

    追蹤人氣

kám á 店

Kám á店 作者 張秀滿 每一擺若想著細漢ê時,我攏會想著阮tau附近hit幾間kám á店,雖然in m̄是扮演真重要ê角色,總--是,tī我成長ê過程,in攏恬恬tī hia。 古早ê kám á店,大部份攏無店名。Tī我記持內ê第一間kám á店,叫做『阿興in嬸婆』。因為teh賣物件ê老阿媽,是tuà tī阮後壁巷á ê一個查甫gín-á『阿興』ê嬸婆,所以大家叫hit間店『阿興in嬸婆』。『阿興in嬸婆』無賣真tsē民生用品,賣--ê攏是gín-á物。有糖含á、有做色做真重ê李鹹、翁á標、kan-lo̍k、koh有teh hōo gín-á抽ê物件。一角銀抽一支,若運氣好會tàng抽著吊tī頂面ê tshit-thô物。真tsē gín-á攏愛去hia看東看西。M̄-koh我ê阿爸講抽物件是pua̍h-kiáu,阮bē使去抽。我ê阿母mā講hia ê食物無衛生,bē使去買。每一擺,我若看著一陣gín-á tī hia,攏真欣羨。後--來,阿興in嬸婆過身,hit間店tō無koh再開。 離阮tau三、四間厝,另外有一間細間kám á店,是一個少年oo-ba-sáng teh經營。我bat看過伊ê名是『陳桂花』,m̄知為啥物大家攏叫伊『好--a』,大概是伊真有笑面,人人好。『好--a』tuì草地嫁來台南,伊ê翁婿tī石油公司上班。聽講伊ê後頭厝tō是teh開kám á店,自細漢伊tō幫忙顧店,真有經驗。『好--a』真méh-lia̍h,gâu做生理。店雖然細間,ta̍k項物件攏買會著,生理mā真好。有一tsām koh兼辦郵局ê業務,做kah tshih-tshih tshiànn-tshiànn,真無閒。 我會記得細漢ê時,ta̍k下晡若睏醒,阿母攏會hōo我五角銀去『好--a』ê店買五個牛奶餅。有一kuá oo-ba-sáng下晡時無代誌,攏tī hia開講,算是社區消息ê交換中心。我讀小學ê時,因為kíng食,人真sán。有一擺去『好--a』ê店beh買鹹梅á,無想著伊講:「人to teh黃酸--a koh beh食tse,bē使買,轉--去。」我無法度,鼻á摸--leh倒轉--來。Tsit-má想--起-來,伊mā是一個有良心ê生理人。 『好--a』有一個後生kap我平年,小學bat讀仝班。伊大學讀海洋學院,畢業了,kap人做生理。後--來,去中國做台商。Hit陣『7-eleven』已經開始流行,『好--a』tō kā伊ê店收--起-來,去中國顧孫á。 『吉利果ê oo-ba-sáng』tī一條巷á內,是我讀國中ê時才開ê一間kám á店。這個名是阮大姊ê kiánn叫--出-來-ê。Hit陣伊差不多三歲,ta̍k日攏ài去hia買一個『吉利果』轉來食,後--來大家攏tuè伊叫hit個頭家娘『吉利果oo-ba-sáng』。這間店比『好--a』ê khah大間,m̄-koh物件khǹg kah tsa̍t thóng thóng。有時kan-na beh買糖,伊mā會tshuē無。Oo-ba-sáng koh無gâu算數,找錢有時攏ài替伊算。伊ê翁婿是公家機關ê職員,伊開店tàu thàn錢。印象中『吉利果oo-ba-sáng』有真tsē gín-á,大漢--ê、細漢--ê、抱--ê、āinn--ê,因為厝內e̍h,伊拍細塊桌á tī巷á邊hōo gín-á寫習題。 有一冬是龍年,人講hit尾龍是好龍,真tsē人流行生龍kiánn。『吉利果oo-bah-sáng』mā koh大pak肚,後--來生一個查某kiánn。阮攏叫伊『小龍女』。時間過真緊,我家己讀冊無閒,厝邊tau ê gín-á mā漸漸大漢。有一工聽我ê阿母teh講『小龍女』考著『台南女中』。我心內想若是認真,tī巷á邊寫功課ê gín-á mā會tàng考著好學校。 後--來,我出國,tō無koh再有厝邊tau ê消息。今年三--月,我轉去台南,行過hit條巷á。Tī hia我看無kám á店,『吉利果oo-ba-sáng』in一家mā已經搬走。我問阿母,才知影in家己買厝,搬去tuà家己ê厝。阿母koh講『小龍女』大學畢業了後,考入去電視公司,tsit-má tī電視台teh報新聞。我知影台灣這幾冬新聞台加真tsē,tī電視台報新聞mā無過去hiah希罕。總--是,我若想著『吉利果oo-ba sáng』開一間小小ê kám á店,會tàng買厝koh栽培gín-á讀冊,mā替in歡喜。 台灣tsit-má四界攏是便利商店(親像『7-eleven』、『全家』)。Tī便利商店m̄-nā會tàng買著kám á店貨、koh會tàng買pháng、便當,繳水、電、瓦斯、停車費、寄包裹快批、買報紙、看雜誌。便利商店已經tsiânn做現代台灣人生活ê一部份。傳統ê kám á店一間一間收--起-來。M̄-kú若想著細漢ê時,我iah是會想著阮tau附近hit幾間kám á店。
相簿設定
標籤設定
相簿狀態